Ammucciateddu ‘ntra muntagni e sciari

c’è lu paisi di mè patri, anticu.......

è Saracinu e lu casteddu appari

d’unni ‘mpittò a so’ tempu lu ‘nnimicu.

Di lu stratuni ‘na casuzza un pari:

comu si trasi pari nicu nicu;

com’un vintagghiu, dòmina lu mari

e Santu Milianu scinni a picu.

E cc’è la paci santa e l’armunia

di la natura bona e cc’è l’amuri,

e cc’è San Ghiavucuzzu chi talia

sta genti chi cù stentu e cù duluri......

curri ogni ghiornu all’antu, a la campìa,

e lu panuzzu vagna di suduri!